هل تعاني من نوبات تشنج وإغماء تسببت في تشخيصك بالصرع دون تحسن؟ اكتشف القصة الحقيقية لكيف يسبب فرط نشاط العصب الحائر واضطراب الجهاز العصبي اللاإرادي التشنجات والإغماء المفاجئ.
جات لي مريضة في العشرينات من العمر بتشتكي بقالها ٥ سنين من نوبات تشنجية عنيفة مصاحبة باضطرابات في الوعي أو أغماء كامل.
سامعك ياللي بتقول : إنت دكتور قلب .. إيه علاقتك بالتشنجات ؟ مش ده تخصص مخ و اعصاب ؟!
هقولك:- إنت صح بس لما تسمع باقي تفاصيل القصة هتفهم ليه المريضة دي جات لي رغم إن شكوتها تبدو للوهلة الأولى مالهاش أي علاقة بالقلب.
في سنة ٢٠٢١ و مع بدأ حدوث النوبات التشنجية دي عند المريضة ؛ أهلها خدوها لأكتر من طبيب من أطباء المخ و الأعصاب.
البنت عملت رنين مغناطيسي على المخ و رسم مخ أكتر من مرة و كل مرة بيتم التأكد من سلامة المخ و عدم وجود أي بؤر كهربية في المخ قد تسبب نوبات التشنج و الإغماء.
طب إيه ؟ يعني كده المفروض أطباء المخ و الاعصاب يقولوا للمريضة إن مخها سليم و إن اللي بيجي لها مش نوبات صرع ؟؟
للأسف مش ده اللي بيحصل ؛ أومال إيه اللي بيحصل ؟؟
اللي بيحصل إن رغم سلامة المخ و سلامة كهربة المخ أطباء المخ و الأعصاب بيوصفوا للمريض علاج صرع برضو استناداً على قاعدة علمية بتقول إن مش كل مرضى الصرع بيظهر عندهم خلل كهربي في المخ ؛ بمعنى إن الشخص قد يكون عنده صرع و مع ذلك الرنين المغناطيسي و رسم المخ طبيعيين تماماً.
لو سلمنا إن القاعدة دي سليمة يبقى المفروض المريض لما ياخد علاج الصرع نوبات التشنج و الإغماء تختفي أو على أسوء الفروض تقل.
لكن في الحقيقة مش ده اللي بيحصل لإن المريض رغم أدوية الصرع برضو بتجي له نوبات تشنج و إغماء متكررة ؛ بل بالعكس دي ممكن كمان تزيد.
هل في الحالة دي أطباء المخ و الاعصاب بيعيدوا نظر في التشخيص تاني ؟ أو يراجعوا نفسهم في مدى صحة استنتاجهم بإن المريض عنده صرع ؟
للأسف برضو لا ؛ دول بيزودوا أدوية كهربة المخ أكتر و يكتبوا أدوية مكثفة و جرعات عالية و مع ذلك برضو نوبات التشنج و الإغماء بتيجي زي الأول و أكتر ناهيك بقى كمان عن الآثار الجانبية المزعجة للأدوية دي.
سامعك ياللي بتقول للي جنبك : برضو ما عرفناش إيه علاقة التشنجات و الاغماء بالقلب و ليه المريض قرر في وسط زحمة أدوية الصرع إنه يغير اتجاهه فجأة و يروح لدكتور قلب !؟
حل اللغز ده يكمن في الإجابة على سؤال في منتهى الأهمية ماحدش فكر يسأله للمريض و هو :
هل عندك أي أعراض اخرى غير التشنجات و الإغماء ؟
و الإجابة كانت إن المريضة راحت أكتر من مرة لدكتور القلب بسبب انخفاض الضغط و ضيق التنفس و الخفقان و الهبوط.
و راحت لدكتور الأنف و الأذن بسبب طنين الأذن و الدوخة و عدم الاتزان و حساسية الجيوب الأنفية.
وراحت كتير لدكاترة الجهاز الهضمي بسبب الحموضة و ارتجاع المريء و الانتفاخ و الإمساك المزمن.
وراحت لدكتور المسالك البولية بسبب تكرار حدوث التهاب في المثانة البولية و الإلحاح البولي و أحياناً عدم التحكم في البول.
و راحت لدكتور نفسي بسبب دخولها في نوبات اكتئاب و عزلة اجتماعية و حاولت تؤذي نفسها أكتر من مرة.
طيب هو إيه العلاقة بين كل الأعراض دي و حدوث نوبات التشنجات و الإغماء ؟؟
الإجابة :- يبدو من الوهلة الأولى إن الأعراض دي مالهاش أي علاقة ببعضها و لا بالتشنج و الإغماء ؛ لكن مع شوية بحث و تدقيق هنستنتج حاجتين مهمين :-
١- صعب جداً بنت في المرحلة العمرية دي يحصل خلل مفاجيء في كل اجهزتها و الغريب إن نتايج أغلب الفحوصات بتقول إن البنت سليمة و مفيش تفسير واضح لكل الأعراض دي و مش بتتحسن على الأدوية الكتيرة أوي اللي بتاخدها.
٢- مرض الصرع ممكن يسبب نوبات تشنج و إغماء لكن ما يسببش باقي الأعراض الكتيرة اللي عند المريضة.
أكيد في خلل واحد هو اللي عامل كل الأعراض دي في كل جسمها.
بس يا ترى إيه هو السبب الخفي اللي يعمل كل الأعراض دي و مش بيظهر لا في أشعة و لا تحليل و لا منظار ؟!؟
صح .. اضطرابات العصب الحائر و الجهاز العصبي اللاإرادي.
هو ده السبب الوحيد اللي ممكن يجمع كل الأعراض دي مع بعضها : إغماء و تشنج - صداع - خفقان و ضيق النفس - حموضة و ارتجاع - إمساك و انتفاخ - طنين و عدم اتزان - التهابات بولية و سلس بولي - اكتئاب و عزلة اجتماعية.
طلبت من المريضة بعض الفحوصات المهمة:- اختبار المنضدة المائلة- سونار على المثانة البولية أثناء امتلاءها و بعد تفريغها - تحليل مستوي النورأدرينالين الاستلقائي و الانتصابي.
التلات فحوصات أكدوا وجود خلل في العص الحائر و الجهاز العصبي اللاإرادي.
و تأكيداً على كلامي ؛ المريضة دخلت في نوبات التشنج و الإغماء أثناء اجراء اختبار المنضدة المائلة بسبب انخفاض الضغط بشكل مفاجيء و نقص التروية الدماغية ؛ و ده سبب كافي إن المريضة تدخل في نوبات الإغماء و التشنج اللي كانت بتتفسر خطأًً على أنها نوبات صرع نتيجة وجود بؤرة كهربية في المخ.
كتبت للمريضة العلاج و بفضل الله بقالنا شهرين ماجتش نوبة الإغماء و التشنج و لا مرة ؛ ده غير حدوث تحسن ملحوظ في باقي الأعراض القلبية و الهضمية و النفسية و البولية عند المريضة و تحسن ملحوظ في مسألة الدوخة و عدم الاتزان.
أكيد في سؤال بيدور في ذهنكم دلوقتي : أدوية الصرع هتستمر و للا هتقف ؟
في الحقيقة ده سؤال مهم خصوصا إن المريضة بقالها سنين ماشية عليه يعني حتى إيقافه محتاج خطة دقيقة لمنع حدوث أي أعراض انسحابية نتيجة وقفه.
عرضنا الموضوع على طبيب المخ و الأعصاب اللي متابع حالتها و أطلعناه على المستجدات المتعلقة بتشخيص وجود اضطرابات في العصب الحائر و الجهاز العصبي اللاإرادي؛ و الحقيقة الراجل مشكوراً تفهم الوضع و قرر يسحب الأدوية بشكل تدريجي على مدى ٣ شهور و الحمد لله المريضة مش حاسة بأي أعراض انسحابية.
الخلاصة …
نوبات التشنج و الإغماء قد تكون بسبب اضطرابات العصب الحائر و الجهاز العصبي اللاإرادي لا سيما لو فحوصات المخ زي الرنين و رسم المخ أكدوا عدم وجود خلل كهربي في المخ.
رحم الله أخي الدكتور عمرو هيكل
