الصمام المعدني في القلب وصناعة الجلطات.. هل يحميك علاج السيولة دائما ؟
من حوالي ٦ سنين وتحديدا في أكتوبر ٢٠٢٠ جات لي مريضة في الخمسينات من العمر بتتابع معايا بقالها ٤ سنوات.
المريضة عاملة جراحة قلب مفتوح سنة ٢٠١٦ و من وقتها و هي بتجي لي كل ٦ شهور أطمن على قلبها و على العملية و أراجع معاها أدويتها.
المريضة كانت جات لها حمّى روماتيزمية في الطفولة تسببت في حدوث ضيق في الصمام الميترالي بدأ يزيد بالتدريج لحد ما وصل لمرحلة الضيق الشديد مصاحب بذبذبة أذينية في القلب و أصبح من اللازم إجراء جراحة قلب مفتوح لتغيير الصمام الميترالى.
الكشف أظهر إن قلبها كويس و العملية تمام و الصمام الميترالي المعدني يعمل بكفاءة و كمان تحليل السيولة بتاعها اللي بيحدد جرعة الماريفان مظبوط جدا ورقم INR كان ٢,٧
يعني باختصار الحالة مستقرة و الوضع ممتاز جداً و اتفقت معاها أشوفها بعد ٦ شهور في معاد الزيارة المعتاد.
تاني يوم تليفوني رن لاقيت زوج المريضة بيقولي :- الحاجة تعبانة أوي و عمالة تصرخ.
قلت له:- ما انتوا كنتوا لسة عندي امبارح و كانت زي الفل .. إيه اللي حصل ؟
قالي :- كانت زي الفل و فحأة مسكت رجلها اليمين و بتتألم جداً و رجلها من تحت الركبة لونها شاحب و الصوابع لونها أزرق و متلجة.
سرحت لمدة ٣ ثواني في كلامه و بعدها قلت له هاتها لي فوراً و قبل ما تيجي عدي على أقرب مركز أشعة ليك و قوله عايز أعمل دوبلر على شرايين الطرف السفلي الأيمن.
طيب إشمعنى الفحص ده اللي جه في ذهني أثناء المكالمة؟
اصبر ..هتعرف دلوقتي
في خلال ساعة كانت المريضة عندي في العيادة و معاها فحص الدوبلر اللي طلبته منها.
قالت لي :- الحقني يا دكتور .. حاسة إن رجلي هتتقطع و الدكتور اللي عمل الدوبلر قلقني أوي و قالي إن الشريان الفخذي مسدود بجلطة من فوق الركبة.
فحصتها و بصيت على رجلها و فعلا لونها شاحب جداً ده غير إن النبض مش محسوس إطلاقا فوق كفة القدم و الساق كلها ساقعة تلج يعني التروية مقطوعة تماماً عن الساق و فحص الدوبلر أكد نفس الكلام.
قلت لها أنا لازم أحولك على جراح أوعية فوراً عشان يستأصل الجلطة اللي في الشريان الفخذي و ننقذ ساقك من الغرغرينا و البتر.
سألتني سؤال مهم : إزي يحصل لي جلطة في رجلى و أنا ماشية على علاج سيولة ؟
قلت لها :- مش وقته .. هفهمك بعدين .. نلحق رجلك الأول و بعدها أبقى أشرح لك.
المريضة راحت إحدى المستشفيات الحكومية و اتعرضت على جراح أوعية و بالفعل دخلت العملية في نفس الليلة رغم وجود بعض المخاطر المتعلقة بالن••زيف بسبب علاج السيولة ( الماريفان ) و الحمد لله خرجت بالسلامة من الجراحة و تم استئصال الجلطة بنجاح.
زوج المريضة اتصل بيا و طمني علىها و قالي إن الجراح وقف ماريفان و استبدله بحقن كليكسان كل ١٢ ساعة لحد ما ارجع لك.
قلت له خليها تستمر على الحقن و هاتها لي بعد اسبوع اشوفها تكون بدأت تتعافى و تتجاوز فترة النقاهة.
بالفعل المريضة جات لي بعد اسبوع و كانت - بفضل الله- كويسة جداً.
قلت لها :- حمدالله على السلامة يا ست الكل.
قالت لي :- عايزة أفهم يا دكتور إزاي جات لي جلطة و أنا باخد علاج سيولة و ليه الجراح قالي إن الجلطة دي جاية من القلب .. هو أنا قلبي فيه جلطات ؟!!؟
قلت لها:-
أولاً ) إنتي تسجدي لربنا شكر الأول لإن الجلطة جت في شريان الفخذ .. لو الجلطة دي كانت حصلت في أحد شرايين المخ أو الكلى أو الأمعاء كان الوضع هيبقى سيء جداً و في منتهى الخطورة.
ثانياً ) وارد جداً تحصلك جلطة رغم إنه منتظمه على علاج السيولة بسبب وجود صمام معدني في قلبك و بسبب وجود ذبذبة أذينية في القلب و دول من أكثر الأسباب لتكوين جلطات في القلب.
ثالثاً) مستوى السيولة المناسب بالنسبة لك هو بين ٢,٥ و ٣,٥ و انتي في آخر تحليل كانت السيولة ٢,٧ و ده رقم مناسب جداً بس مع ذلك هضطر أرفع جرعة الماريفان بعد اللي حصل ده و اخلي الرقم قريب من الـ ٣,٥ عشان أتفادى تكرار اللي حصل مرة تانية.
رابعاً) فعلاً الجلطة اللي حصلت لك في شريان الفخذ مصدرها القلب بسبب الذبذبة الأذينية و الصمام المعدني زي ما قلت لك و بمجرد ما الجلطة دي بتتكون داخل القلب ؛ القلب بيكون عامل زي الم••دفع اللي بيطلق ق••ذائف بشكل عشوائي في أي مكان في الجسم بسبب تفتت الجلطة و بالتالي الفتافيت دي تسد أي شريان و إنتي و حظك.
المريضة بعد ما كانت جاية لي مضايقة و محبطة بقت تحمد ربنا إن رغم قسوة اللي حصل لها لكن لطف ربنا كان معاها و رغم إن الموضوع يبدو للوهلة الأولى إنه محنة إلا إنه مع التدبر و التأمل يتبين أنه منحة و لو يعلم ابن آدم الغيب لاختار الواقع.
Aisha Aly
احدث المقالات
