الثورة الجديدة في عالم تشخيص و علاج أمراض كهرباء القلب.

اللي أنا ماسكه في ايدي اليمين ده الاصدار القديم من جهاز الهولتر أما اللي في ايدي الشمال فهو آخر و أحدث ما توصل إليه الطب في مجال أجهزة الهولتر.

اللي ما يعرفش يعني إيه جهاز هولتر و بيستخدم في إيه .. ده عبارة عن جهاز بيستخدم لمراقبة و تسجيل ضربات قلب المريض لمدة يوم أو أكثر.

الجهاز ده بنعلقه للمريض في العيادة و يروح بيه البيت يوم أو اتنين أو تلاتة حسب حالة المريض.

الجهاز ده هدفه الرئيسي هو تسجيل الخلل اللي بيحصل في كهرباء القلب بشكل عارض ثم يختفي و يعود مرة أخرى و كل ما المريض يروح يكشف يكون الخلل ده غالبا ً مش ظاهر في الكشف العادي و عشان كده بنضطر لعمل فحص مطول للمريض من خلال جهاز الهولتر اللي بيسجل كل اللي يحصل في قلب المريض على مدى المدة اللي الجهاز موجود فيها مع المريض و بعد ما ناخد الجهاز من المريض نفرغه على جهاز كومبيوتر خاص بالجهاز ده و يتم عمل تحليل لجميع ضربات قلب المريض خلال المدة دي و اكتشاف الخلل الكهربي اللي حير المريض و الأطباء و بالتالي يسهل العلاج.

الفرق بين الجهازين شاسع وفرق التكنولوجيا بينهم رهيب

عندك مثلا ..
• الجهاز الجديد حجمه اصغر بكتير و وزنه لا يتعدى ٣٠ جم و بالتالي لا يمثل أي عبء على المريض على عكس الجهاز القديم اللي وزنه بالبطارية حوالي ٢٠٠ جم.

• الجهاز الجديد مافهوش أي توصيلات و لا أسلاك و لا بيتربط بحزام على وسط المريض أو صدره و بالتالي لا يسبب أي إزعاج.

• الجهاز الجديد فيه بطارية قابلة للشحن بتستمر مدة تصل الى ١٠ أيام عكس الجهاز القديم اللي شغال بالبطارية القلم و مدة عملها لا تتجاوز ٤٨ ساعة و بالتالي يمكن بقاء الجهاز مع المريض مدة أطول لتسجيل الخلل الذي قد يحدث على فترات متباعدة.

• الجهاز الجديد مقاوم للماء يعني المريض ممكن ياخد شاور بيه لو قعد مع المريض ١٠ أيام.

• عدم وجود أسلاك في الجهاز الجديد بيخلي تسجيل ضربات القلب أنقى و لا يوجد أي خلل في التسجيل نتيجة اهتزاز الأسلاك لان الجهاز الجديد بيتلزق مباشرة على صدر المريض.